د ايران دفاع وزير امير عزيز نصيرزاده د ترکيې له دفاع وزير سره د ټيليفوني خبرو پر مهال ويلي، چې د ايران او اسرائيل ترمنځ په اوربند هېڅ باور نه لري او په وينا یې دا مهال د ځان چمتو کولو او د راتلونکي پړاو لپاره د بېلابېلو سناریوګانو او پلانونو په جوړولو بوخت دي.
نوموړي د ترکې دفاع وزير ته ويلي، چې ایران او ترکیه په یوه حساسه سیمه کې موقعيت لري، دواړه هېوادونه ګډ ګواښونه، ګډې ګټې او ګډ برخلیک لري او لازمه ده چې د امنیت د تأمین لپاره ګډې سلا مشورې وکړي.
د ایران دفاع وزیر ټینګار کړی، چې هېواد یې په دې جګړه کې امریکا او اسرائیلو ته قوي ځواب ورکړ او زياتوي «ایران هېڅکله د جګړې د پراخېدو او یا د سیمې د ناامنه کولو غوښتونکی نه دی؛ خو د هر ډول تېري او بې ادبۍ پر وړاندې د قاطع او پښیمانوونکي ځواب لپاره چمتو دی.»
