وزارت داخله می‌گوید که پولیس مبارزه با موادمخدر قوماندانی امنیهٔ ولایت خوست، در نتیجهٔ عملیات کشفی، یک قاچاقبر مشهور و مسلح را در شهر خوست، مرکز این ولایت، بازداشت کرده‌است.
بر بنیاد معلومات منتشرشده از این وزارت، از نزد فرد بازداشت‌شده یک میل کلاشینکوف، شش شاژور، ۴۰۰ فیر مرمی کلاشینکوف، یک میل تومانچه، دو بم دستی و مقداری چرس به‌دست آمده‌است.
وزارت داخله بدون ذکر هویت فرد بازداشت‌شده گفته‌است که تحقیقات پولیس از وی جریان دارد و به‌زودی به ارگان‌های عدلی و قضایی سپرده خواهد شد.
