مسئولین محلی بغلان می‌گویند: امروز صبح در ساحهٔ سیلوی شهر پل‌خمری، یک عسکر ادارهٔ قبلی از جانب افراد مسلح نامعلومی کشته شده است. بر اساس گفته‌های مسئولین محلی، این عسکر کشته‌شده حیات الله محمد نام دارد، که امروز صبح ساعت پنج در ساحهٔ سیلوی شهر پل‌خمری بوسیلهٔ تفنگچه توسط سواری‌های موترسایکل کشته شده است. مسئولین صحت عامهٔ بغلان اظهار داشتند که این عسکر کشته شده در سینه‌اش مرمی خورده بود که براثر زخم‌های عمیق جان خود را از دست داد. مسئولین امنیتی می‌گویند: جستجوی برای گرفتاری قاتلین این عسکر جریان دارد و قاتلین عاجل قانون به پنجهٔ قانون سپرده می‌شوند. امروز صبح، بعضی از رسانه‌ها گزارش‌هایی نشر کردند که گویا حیات الله محمد، از سوی افراد امنیتی بغلان کشته شده است. با حاکمیت دوبارهٔ طالبان بر افغانستان، از آغاز همهٔ اشخاص نظامی سابق، عفو شدند و تا حال از سوی امارت اسلامی، به هیچ فرد نظامی هیچ ضرر نرسیده است. الان در نقطه نقطهٔ کشور، هزاران عسکر ادارهٔ قبلی امور روزمرهٔ خود را پیش می‌برند و تا حال هیچ کس از آنان مورد آزارواذیت قرار نگرفته است. یک منبع در بغلان به صدای هندوکش اظهار داشته که حیات الله محمد دشمنی شخصی داشته و یک برادرش هم ده سال قبل از سوی یک قومندان ادارهٔ سابق به نام حسین طاهر کشته شده است.
